सिन्धुपाल्चोक, लामोसाँघु
“पहिला जनता बचाऔं राजनिति पछि गरौला” भन्ने नाराका साथ निरन्तर जनप्रीय काममा खटिरहनुभएका पुर्व मन्त्री एवं केन्द्रिय सदस्य मोहन बहादुर बस्नेतको प्रमुख आतिथ्यतामा आज नेपाली काँग्रेस सिन्धुपाल्चोक क्षेत्र नं. १ प्रदेश सभा “ख” को आयोजनामा नि:शुल्क स्वास्थ्य सामाग्री वितरण कार्यक्रम सम्पन्न भएको छ । कार्यक्रम बलेफी गाउँ पालिका ८ लामोसाँघुमा भएको हो । उहाँ आफ्नै खुट्टा भाँचेर प्लास्टर गरेको अवस्थामा पार्टीको कार्यक्रममा उपस्थित भैरहेका छन् । 
यस्तो अवस्थामा उपस्थित उनले उक्त कार्यक्रमलाई सम्बोधन गर्दै भन्नुभयो; “मेरो खुट्टाको अप्रेसन दोहोर्याएर गर्न मिल्छ तर चुनाव हारे दोहोर्याउन मिल्दैन, त्यसैले अब नजिकिँदै गरेको चुनावी अभियानमा सबै खटेर लाग्नुस्, जनताको समस्या घरघरमा पुगेर बुझ्नुस् र सके पूरा गराउनुस् नसके पार्टीमा कुरा राख्नुस् सबै मिलेर हल गर्न तर्फ लाग्नुस् ।” त्यतिले नि नसके म छु । 
नेता बस्नेतले आफु बिरामि हुँदा उपचार गर्न जति सहज छ सामान्य जनता बिरामि हुँदा उपचार गर्न कयौं गुणा कठिन रहेको बताउनुभयो । अहिले कोरोनाको तेस्रो लहर चलिरहेको र जनताले सिटामोल समेत पाउन नसकेको अवस्थामा उहाँको पहलमा वितरण भएको मास्क र सिटामोल लिएर टोलटोलमा जान सबै नेता कार्यकर्ताहरुलाई निर्देशन दिनुभएको छ । 
त्यस्तै नेता बस्नेतले अबको चुनावमा उम्मेदवारी टिकट आफुले बाँड्ने नभै इकाई देखि सिफारिस भएर आएको व्यक्तिले पाउने स्पष्ट पार्नुभयो । “जसले जनताको दुख , पिडामा काम गरेको छ उसले टिकट पाउँछ र जित्नुपनी पर्यो” भन्नू भयो । आफुले स्थानीय चुनावमा जोसुकैले टिकट पाएपनि वडा वडामा पुगेर गर्नुपर्ने सहयोगको लागि तयार रहेको पनि सुनाए । जसका लागि इकाई कमिटीलाई तयारी अवस्थामा रहन निर्देशित गर्नुभएको छ ।
कार्यक्रममा माओवादी र नेकपा एमाले पार्टी परित्याग गरि दर्जनौं नेताकार्यकर्ताहरुलाई काँग्रेसमा स्वागत समेत गर्नुभएको छ । नव प्रवेशीहरुलाई पुर्व मन्त्री बस्नेत सहित पुर्व गृह राज्य मन्त्री विष्णु बिक्रम थापा र नेता मिनकृष्ण महर्जन लगायतले अविर र खादा लगाई स्वागत गरेका थिए । 
कार्यक्रममा सुनकोसी गाउँ पालिका, बलेफी र जुगल गाउँ पालिकाका सभापतिहरुलाई स्वास्थ्य सामग्री जिम्मा लगाएका छन् । जसमा जुगललाई २५ हजार ३४२ पिस मास्क, बलेफीलाई २० हजार ८ सय ६७ र सुनकोसीलाई १९ हजार ४ सय ९६ पिस मास्क हस्तान्तरण गरिएको छ । प्रत्येक पालिकालाई ६४०० पिसका दरले सिटामोल पनि हस्तान्तरण गरेका छन् । यी सामाग्रीहरु प्रत्येक विद्यालयको विद्यार्थी र घरघरमा पुर्याउन गाउँ पालिका कार्यसमितिलाई निर्देशन दिएको प्रदेश कार्यसमितिका सभापति देवेन्द्र खड्काले जानकारी दिनुभएको छ ।
