सिन्धुपाल्चोक
सिन्धुपाल्चोक नेपाली काँग्रेसको १४ औं जिल्ला अधिवेशन भर्खरै समापन भएको छ । जिल्ला पदाधिकारीमा ७ सहित २५ सदस्यमा भएको निर्वाचनमा संस्थापन पक्षका पुर्व मन्त्री मोहन बहादुर बस्नेतको टिमले संस्थापन इतरका उम्मेदवारलाई कतै जित्ने मौका दिएनन् । संस्थापन इतरका उम्मेदवार क्लिन स्विपमा परेको छ । जिल्ला सभापति देखि सह-सचीव सम्म सबै प्रधानमन्त्री एवं केन्द्रिय सभापति शेरबहादुर देउवा पक्षले जितेको छ ।
सभापतिको १ सिटका लागि भएको निर्वाचनमा पहिलो चरणमा ३ जना लडेका थिए । जसमा वंशलाल तामाङ, डा. प्रेमध्वज लामा र जंग बहादुर लामा बिच प्रतिस्पर्धा भएको थियो । प्रतिस्पर्धामा जंग बहादुर लामाले पहिलो, वंशलाल तामाङले दोश्रो र डा. प्रेमध्वज लामाले तेस्रो मत ल्याउँदा कुनैले पनि ५१% मत प्राप्त गर्न सकेनन् । त्यसपछि पुनः पहिलो र दोस्रो स्थान पाएका वंशलाल तामाङ र जंग बहादुर लामा बिच सभापति पदको निर्वाचन भए । तेस्रो स्थान प्राप्त डा. लामाले वंशलाल तामाङलाई साथ दिएपछी मतदान प्रक्रिया निकै रोचकबनेको थियो ।
यसरी तामाङ र डा. लामा मिलेर लडेपनि संस्थापन पक्ष यानिकि बस्नेत टिमका जंगबहादुर लामाले ६४ मतान्तरले जित हाँसिल गरे । त्यस्तै उप-सभापतिमा पनि संस्थापन पक्षकै टंक कार्की र दोर्जे लामा (हाउडे), सचिबमा भक्तध्वज बोहोरा र रमेश भण्डारी, सह-सचिबमा कृष्णभक्त नेपाल र नरेश कार्कीले जितेका छन् । निर्वाचित सम्पुर्ण पदाधिकारीहरु संस्थापन पक्षकै रहेको जिल्लाका एक नेताले जनाए ।
