सिन्धुपाल्चोक
स्थानीय सरकारले कृषि क्षेत्रलाई प्रबर्द्धन गर्ने विभिन्न कार्यक्रम ल्याउँदै गर्दा बाह्रबिसे नगरपालिकाले भनें हलगोरु पाल्ने कृषकलाई प्रोत्साहन स्वरुप नगद रु. १० हजारका दरले अनुदान वितरण गरेको छ । नगर भित्र पाल्दै आएको ७०० हल गोरुलाई नगरले ७० लाख बराबर बजेट छुट्याएर अनुदान वितरणको सुरुवात गरेको हो ।
परम्परागत कृषि खेती एवं गोरु पाल्ने कार्य नै लोप हुने अवस्थामा पुगेकोले त्यसलाई जोगाउन यस्तो कार्यक्रम ल्याएको नगर प्रमुख बालकृष्ण बस्नेतले बताए । त्यस्तै बस्नेतका अनुसार गोरु पालनबाट कम्पोस्ट मल उत्पादन हुने हुँदा अर्गानिक खेतीका लागि समेत सहयोग पुग्ने धारणा प्रस्तुत गर्नुभयो । 
कार्यक्रममा प्रमुख अतिथिका रुपमा माननीय मोहनबहादुर बस्नेत उपस्थित हुनुभएको थियो । उहाँले खेतमा आफैंले गोरु समेत जोत्नुभयो । त्यस पश्चात् कार्यक्रमलाई सम्बोधन गर्दै बस्नेतले भन्नुभयो, “गाउँघरमा आजकाल भैंसी, राँगा, गाई र गोरु पाल्न छाडीसकेको छ, पशु पालन गर्न छाड्ने अनि रासायनिक मल पाएन भनेंर चिन्ता लिने काम राम्रो हैन । गोरु पाले कम्पोस्ट मल पनि हुने, आफ्नो बारी पनि जोत्ने अनि अर्गानिक उत्पादन पनि गर्न सकिने भएकोले फाइदै फाइदा छ ।” उनका अनुसार आधुनिक कृषि भन्दै हाल ट्याक्टर वितरण गर्दै आएको देखिए पनि यो अत्यन्तै झन्झटिलो, खर्चिलो र भौगोलिक रुपमा उपयुक्त नभएको बताउनुभयो । 
त्यस्तै, उपप्रमुख मञ्जु तामाङले ट्याक्टरको लागि नटबोल्ट, इन्धन, अन्य सामाग्री किन्नु पर्दा हाम्रो पैसा सबै बिदेशीने भएकोले हलगोरु प्रयोग गर्दा हाम्रो पैसा हाम्रै गाउँघरमा बस्ने उनको धारणा थियो । 
यसरी हलगोरु पालेका कृषकहरु नगद अनुदान पाएपछि निकै खुशी देखिन्थे । नगरपालिकाले अनुदान संगै गोरुको बिमा समेत गरिदिएकोमा उनिहरु ढुक्क साथ अब हलगोरु पाल्ने बताउँछन् । यस्तो खालेको कार्यक्रम स्थानीय सरकारले गर्दा लोप हुँदै गएको गोरु पालन तर्फ पुनः आकर्षित हुने देखिन्छ ।
