ललितपुर
नेपालमा पहिलो पटक रचनात्मक पत्रकारिताबारे तयार गरिएको पुस्तक ‘रचनात्मक पत्रकारिताः हाते पुस्तक’ सार्वजनिक भएको छ । पत्रकार तथा अध्येता टुमराज कोइरालाद्वारा लेखिएको पुस्तक बागमती प्रदेशको सञ्चार रजिष्ट्रारको कार्यालयमार्फत यसै सातादेखि पाठकका लागि उपलब्ध भएको हो ।
सञ्चार रजिष्ट्रार रेवती प्रसाद सापकोटाका अनुसार पुस्तकले समाजमा बढ्दो निराशा र नकारात्मक समाचारको प्रभावलाई न्यूनीकरण गर्दै पत्रकारितामाथिको विश्वास पुनःस्थापित गर्ने उद्देश्य लिएको छ । विश्वका विभिन्न मुलुकमा अभ्यास भइसकेको रचनात्मक पत्रकारिता अब नेपालमा पनि आवश्यक रहेको उनले बताए ।
त्रिभुवन विश्वविद्यालय पत्रकारिता तथा आमसञ्चार केन्द्रीय विभागका प्रमुख डा. कुन्दन अर्यालले पुस्तकले नेपाली पत्रकारलाई नयाँ दृष्टिकोण दिने र पत्रकारिता अध्ययनरत विद्यार्थीलाई उपयोगी मार्गदर्शक हुने विश्वास व्यक्त गरेका छन् ।
यस पुस्तकमा अन्तर्राष्ट्रिय रचनात्मक पत्रकारिता अभ्याससँग सम्बन्धित व्यक्तिहरूका भूमिकासमेत समावेश छन् । सोलुसन जर्नालिज्म नेटवर्क की सह–संस्थापक तथा पुलित्जर पुरस्कार विजेता टिना रोजेनबर्गले नेपालमा समाधान पत्रकारिता अवधारणामात्र नभई अभ्यासमै प्रवेश गरिसकेको उल्लेख गरेकी छिन् । त्यस्तै, कन्स्ट्रक्टिभ इन्स्टिच्युट (डेनमार्क) का प्रमुख उल्रिक हागरुपले पुस्तकले लोकतन्त्र र पत्रकारिताको गहिरो सम्बन्धलाई स्पष्ट पारेको टिप्पणी गरेका छन् भने अष्ट्रेलियास्थित मोनाश विश्वविद्यालयकी प्राध्यापक केट टोर्नीले पुस्तक पत्रकारितामा सकारात्मक परिवर्तनको आधार बन्ने धारणा राखेकी छन् ।
लेखक कोइरालाले पुस्तक तयार पार्ने क्रममा विश्वमा भइरहेका रचनात्मक पत्रकारिता अभ्यासलाई नेपाली सन्दर्भसँग जोड्ने प्रयास गरिएको बताए । डेढ दशकदेखि पत्रकारिता क्षेत्रमा सक्रिय रहेका उनले यसअघि कला अनुरागी नामबाट लेखन गर्दै आएका थिए ।
‘रचनात्मक पत्रकारिताः हाते पुस्तक’ हेटौँडा र जावलाखेलस्थित सञ्चार रजिष्ट्रारको कार्यालयबाट प्राप्त गर्न सकिनेछ ।
